എന്തുകൊണ്ട് നമ്മൾ ഒരു പ്രകൃതിചികിത്സാ ആഹാരരീതി | നാച്ചുറോപ്പതി ഡയറ്റ്) തിരഞ്ഞെടുക്കണം?

​നിങ്ങൾ ഏത് തിരഞ്ഞെടുക്കും? ശരീരത്തിന് ആവശ്യമുള്ള എല്ലാ പോഷകങ്ങളും അടങ്ങിയ, എന്നാൽ നിങ്ങളുടെ ശരീരപ്രകൃതിക്ക് ചേരുന്നതാണോ എന്ന് ഉറപ്പില്ലാത്ത ഒരു പൊതുവായ ഭക്ഷണക്രമമോ? അതോ നിങ്ങളുടെ രുചിക്കും ശരീരത്തിനും ഒരുപോലെ ഇണങ്ങുന്ന ആരോഗ്യകരവും സ്വാഭാവികവുമായ ആഹാരമോ?

​ഇതൊരു ലളിതമായ ചോദ്യമായി തോന്നാം, അല്ലേ? തീർച്ചയായും രണ്ടാമത്തെ തിരഞ്ഞെടുപ്പാണ് (ഓപ്ഷനാണ്) മികച്ചതെന്ന് ഒറ്റനോട്ടത്തിൽ തോന്നും. എന്നാൽ അത്ഭുതമെന്നു പറയട്ടെ, നമ്മളിൽ ഭൂരിഭാഗം ആളുകളും നിത്യജീവിതത്തിൽ ആദ്യത്തെ തിരഞ്ഞെടുപ്പാണ് (ഓപ്ഷനാണ്) നടപ്പാക്കാറുള്ളത്.

​നിങ്ങൾ അങ്ങനെയാണ് ചെയ്യുന്നതെന്ന് ഒരുപക്ഷേ നിങ്ങൾക്ക് തോന്നുന്നുണ്ടാകില്ല. കാരണം ചപ്പാത്തി, ചോറ്, പരിപ്പ് വർഗ്ഗങ്ങൾ, പച്ചക്കറികൾ, പഴങ്ങൾ, അണ്ടിപ്പരിപ്പുകൾ, പാൽ, തൈര്, ആവശ്യത്തിന് വെള്ളം എന്നിവയെല്ലാം നിങ്ങളുടെ ഭക്ഷണത്തിൽ ഉണ്ടാകാം. ശരീരത്തിന് ആവശ്യമായ എല്ലാ പോഷകങ്ങളും ലഭിക്കുന്നുണ്ടെന്ന് നിങ്ങൾ ഉറപ്പുവരുത്തുന്നുമുണ്ട്. ഇത് നല്ല ആരോഗ്യം നൽകേണ്ടതല്ലേ? എന്നാൽ എപ്പോഴും അങ്ങനെ ആകണമെന്നില്ല.

​നമ്മൾ തിരഞ്ഞെടുക്കുന്ന പൊതുവായ ഭക്ഷണക്രമം നമ്മുടെ ശരീരത്തിന് പൂർണ്ണമായും അനുയോജ്യമാകണമെന്നില്ല എന്നതാണ് ഇതിന് കാരണം. കാരണം നമ്മൾ ഓരോരുത്തരുടെയും ശരീരഘടനയും, ആവശ്യങ്ങളും, ദഹനപ്രക്രിയയുടെ നിരക്കുമെല്ലാം വ്യത്യസ്തമാണ്.

​അങ്ങനെയെങ്കിൽ, ഇവയെല്ലാം കണക്കിലെടുത്ത് നമുക്ക് ഏറ്റവും അനുയോജ്യമായ ആഹാരം എങ്ങനെ തിരഞ്ഞെടുക്കാം?

​ഇവിടെയാണ് പ്രകൃതിചികിത്സാ ആഹാരരീതിയുടെ (നാച്ചുറോപ്പതി ഡയറ്റ്) പ്രാധാന്യം. പ്രകൃതിചികിത്സയ്ക്ക് വേദങ്ങളോളം, അതായത് ഏകദേശം 3,500 വർഷത്തെയോളം പഴക്കമുണ്ട്! അഥർവ്വവേദത്തിൽ പ്രകൃതിദത്തമായ ചികിത്സകളെക്കുറിച്ച് പരാമർശിക്കുന്നുണ്ട്. എന്നാൽ, ഇന്നത്തെ മാറിവരുന്ന ജീവിതശൈലിയും തെറ്റായ ഭക്ഷണരീതികളും കാരണം ഉണ്ടാവുന്ന രോഗങ്ങൾ കൂടിയപ്പോഴാണ് ആളുകൾ വീണ്ടും ഇതിലേക്ക് ശ്രദ്ധ തിരിക്കാൻ തുടങ്ങിയത്.

​പ്രകൃതിചികിത്സയെക്കുറിച്ചും അതിലെ ഭക്ഷണരീതിയെക്കുറിച്ചുമുള്ള നിങ്ങളുടെ സംശയങ്ങൾ മാറ്റാൻ സഹായിക്കുന്ന ചില ചോദ്യോത്തരങ്ങൾ താഴെ നൽകുന്നു:

1. എന്താണ് പ്രകൃതിചികിത്സ (നാച്ചുറോപ്പതി)?

​നമ്മുടെ ശരീരത്തിലുള്ള പഞ്ചഭൂതങ്ങളെ (വായു, വെള്ളം, അഗ്നി, ഭൂമി, ആകാശം) സമനിലയിലാക്കി രോഗങ്ങളെ സുഖപ്പെടുത്തുന്ന ഒരു ചികിത്സാരീതിയാണിത്. ഇതിൽ ശസ്ത്രക്രിയകളോ വേദനാജനകമായ ചികിത്സകളോ ഇല്ല.

​മരുന്നുകൾ ഉപയോഗിക്കാതെ തന്നെ, ശരീരത്തിന് സ്വയം രോഗം ഭേദമാക്കാനുള്ള സ്വാഭാവിക ശേഷിയെ ഉണർത്തുകയാണ് ഈ ചികിത്സ ചെയ്യുന്നത്. പ്രത്യേക ഭക്ഷണക്കൂട്ടുകൾ, പ്രകൃതിദത്ത സസ്യങ്ങൾ, വ്യക്തിഗത ഭക്ഷണക്രമം, നല്ല ശീലങ്ങൾ എന്നിവയാണ് ഇതിലെ ‘മരുന്നുകൾ’. പുകവലി, മദ്യപാനം തുടങ്ങിയ മോശം ശീലങ്ങൾ ഉപേക്ഷിക്കാൻ ഇത് പ്രോത്സാഹിപ്പിക്കുന്നു.

2. പ്രകൃതിചികിത്സയിലൂടെ ഏതൊക്കെ രോഗങ്ങൾ മാറ്റാം?

• ​പ്രകൃതിചികിത്സ രോഗലക്ഷണങ്ങളെ മാത്രമല്ല ചികിത്സിക്കുന്നത്. അതിനാൽ രോഗമുള്ളവർക്കും ഇല്ലാത്തവർക്കും ആരോഗ്യം മെച്ചപ്പെടുത്താനും നിലനിർത്താനും ഒരു പ്രകൃതിചികിത്സകനെ സമീപിക്കാവുന്നതാണ്.
• ​രോഗങ്ങൾ വരാതെ തടയുന്നതിനാണ് പ്രകൃതിചികിത്സ ഏറ്റവും ഫലപ്രദം. അസ്ഥിഭംഗം (എല്ല് പൊട്ടുന്നത്), ഹൃദയാഘാതം തുടങ്ങിയ പെട്ടെന്നുണ്ടാകുന്ന അത്യാഹിതങ്ങളെ ഇത് സുഖപ്പെടുത്തുമെന്ന് അവകാശപ്പെടുന്നില്ലെങ്കിലും, അവ വരാതെ തടയാൻ സഹായിക്കും. കൂടാതെ, കാൻസർ ചികിത്സയ്ക്ക് ഒരു വലിയ പിന്തുണ നൽകാൻ ഇതിന് സാധിക്കും. ഉദാഹരണത്തിന്, കീമോതെറാപ്പിയോടൊപ്പം ശരിയായ പോഷകാഹാര ചികിത്സയും നൽകുന്നത് രോഗമുക്തി എളുപ്പമാക്കും.
• ​പ്രമേഹം, ഹോർമോൺ വ്യതിയാനങ്ങൾ, ഉയർന്ന രക്തസമ്മർദ്ദം (ഹൈപ്പർടെൻഷൻ ) തുടങ്ങിയ വിട്ടുമാറാത്ത രോഗങ്ങൾക്ക് പ്രകൃതിചികിത്സ മികച്ചൊരു പരിഹാരമാണ്. രോഗത്തിന്റെ ലക്ഷണങ്ങളെ മാത്രം ചികിത്സിക്കാതെ, അതിന്റെ മൂലകാരണത്തെ കണ്ടെത്തി ഇല്ലാതാക്കുന്നതുകൊണ്ടാണ് ഇത് സാധ്യമാകുന്നത്.

​എല്ലായ്‌പ്പോഴും ഗുളികകൾ കഴിക്കുന്നത് കടുത്ത പാർശ്വഫലങ്ങൾക്ക് കാരണമാകും. അതുകൊണ്ട് പ്രകൃതിദത്തമായ വഴി തിരഞ്ഞെടുക്കുന്നതാണ് ബുദ്ധി. മരുന്നുകളുടെ അളവ് മാറ്റാനായി ഇടയ്ക്കിടെ ഡോക്ടറെ കാണാൻ പോകുന്നത് ഒഴിവാക്കാൻ ആലോചിച്ചുനോക്കൂ. പകരം, ഭക്ഷണക്രമം നിയന്ത്രിച്ചുകൊണ്ട് നിങ്ങളുടെ ആരോഗ്യം സ്വന്തം നിയന്ത്രണത്തിൽ തന്നെ വെക്കാൻ സാധിക്കും.

3. പ്രകൃതിചികിത്സയിൽ ഭക്ഷണത്തിനുള്ള പങ്ക് എന്താണ്?

​ഈ ചികിത്സയുടെ ഏറ്റവും പ്രധാനപ്പെട്ട ഭാഗമാണ് ഭക്ഷണം. മനുഷ്യശരീരത്തിന് മൂന്ന് പ്രകൃതങ്ങളുണ്ട് – വാതം, പിത്തം, കഫം. നിങ്ങളുടെ ശരീരപ്രകൃതി അനുസരിച്ചാണ് പ്രകൃതിചികിത്സകൻ ചികിത്സ നിശ്ചയിക്കുന്നത്. അതിലൊന്നാണ് ഭക്ഷണക്രമം.
​നിങ്ങളുടെ ശരീരപ്രകൃതിക്ക് ചേരാത്ത ആഹാരം കഴിക്കുന്നത് ശരീരത്തിൽ അസ്വസ്ഥതകൾ ഉണ്ടാക്കും. പ്രകൃതിചികിത്സാ ഭക്ഷണക്രമം ഈ അസന്തുലിതാവസ്ഥ പരിഹരിച്ച് ശരീരത്തെ ആരോഗ്യകരമായ പഴയ അവസ്ഥയിലേക്ക് തിരികെ കൊണ്ടുവരുന്നു.

​ഒരു ഉദാഹരണം: 25 വയസ്സുകാരനായ ശങ്കറിന് (പേര് മാറ്റിയിരിക്കുന്നു) പ്രമേഹം ബാധിക്കുകയും രക്തത്തിലെ പഞ്ചസാരയുടെ അളവ് (ഫാസ്റ്റിങ് ഷുഗർ) 240 ആകുകയും ചെയ്തു. പല ചികിത്സകൾ നടത്തിയിട്ടും കുറയാത്തതിനെ തുടർന്ന് അദ്ദേഹം പ്രകൃതിചികിത്സയെ ആശ്രയിച്ചു. അദ്ദേഹം പറയുന്നു: “10 ദിവസത്തെ പ്രകൃതിചികിത്സാ ഭക്ഷണക്രമത്തിന് ശേഷം എന്റെ ഷുഗർ ലെവൽ 140 ആയി കുറഞ്ഞു. ആറുമാസത്തിനുശേഷം അത് 101-102 നിലവാരത്തിലെത്തി. അതിനുശേഷം ഞാൻ മരുന്നുകൾ നിർത്തുകയും ഈ ഭക്ഷണരീതി തുടരുകയും ചെയ്യുന്നു.”

​എന്നാൽ, ഓരോരുത്തരുടെയും ശരീരത്തിന്റെ പ്രതികരണം വ്യത്യസ്തമായിരിക്കുമെന്ന് ഓർക്കുന്നത് നല്ലതാണ്.

4. ഒരു പ്രകൃതിചികിത്സാ ഭക്ഷണക്രമം എന്നെ എങ്ങനെ സഹായിക്കും?

​ശരീരത്തിലെ പോഷകക്കുറവ് നികത്താൻ സാധാരണയായി നൽകുന്ന മരുന്നുകൾ, നിങ്ങൾക്കായി തയ്യാറാക്കുന്ന പ്രകൃതിചികിത്സാ ഭക്ഷണത്തിൽ തന്നെ അടങ്ങിയിട്ടുണ്ടാകും.

​ഇത് ശരീരത്തിലെ അസന്തുലിതാവസ്ഥകളെ പരിഹരിക്കുന്നു. ചില ഭക്ഷണങ്ങളോട് നമുക്കുള്ള അമിതമായ കൊതിക്കും വിമുഖതയ്ക്കും കാരണം ഈ അസന്തുലിതാവസ്ഥയാണ്. ഉദാഹരണത്തിന്, നിങ്ങൾക്ക് കാൽസ്യത്തിന്റെ കുറവുണ്ടെങ്കിൽ, കാൽസ്യം കൂടുതലുള്ള ഭക്ഷണങ്ങളും അവ ശരീരം എളുപ്പം ആഗിരണം ചെയ്യാൻ സഹായിക്കുന്ന കൂട്ടുകളുമാണ് ഭക്ഷണത്തിൽ ഉൾപ്പെടുത്തുക. ഇത് ഗുളികകൾ കഴിക്കുന്നതിനേക്കാൾ വളരെ നല്ലതാണ്.
​കൂടാതെ, രാസവസ്തുക്കളോ, കൃത്രിമ നിറങ്ങളോ, പ്രിസർവേറ്റീവുകളോ ഇല്ലാത്ത ശുദ്ധമായ പ്രകൃതിദത്ത ഭക്ഷണത്തിലേക്ക് ഇത് നമ്മെ തിരികെ കൊണ്ടുപോകുന്നു. ഇത്തരം ആഹാരം ശരീരത്തിന് കൂടുതൽ ഊർജ്ജവും (പ്രാണൻ) ഉന്മേഷവും നൽകും. ഇത് ചിന്തകൾക്ക് ശുദ്ധിയും മനസ്സിന് ഉണർവ്വും നൽകുകയും മടിയും തളർച്ചയും മാറ്റുകയും ചെയ്യും.

5. എന്റെ രോഗത്തിന് അനുയോജ്യമായ ഒരു നല്ല പ്രകൃതിചികിത്സാ ആഹാരക്രമം നിർദ്ദേശിക്കാമോ?

​പ്രകൃതിചികിത്സയിൽ എല്ലാവർക്കും പൊതുവായ ഒരൊറ്റ ഭക്ഷണക്രമമില്ല. ഒരേ കുടുംബത്തിലെ വ്യക്തികൾക്ക് പോലും ആവശ്യകതകൾ വ്യത്യസ്തമായിരിക്കും.

​പ്രമേഹത്തിന് ഒന്ന്, ഉയർന്ന രക്തസമ്മർദ്ദത്തിന് മറ്റൊന്ന് എന്നിങ്ങനെ പ്രത്യേകം പ്രത്യേകമായി ഇതിൽ വേർതിരിച്ചിട്ടില്ല. എങ്കിലും, ഈ ഭക്ഷണരീതി ശീലമാക്കുന്നത് നിങ്ങളുടെ ജീവിതനിലവാരം ഉയർത്തും.

6. തടി കുറയ്ക്കാനും മുഖക്കുരു മാറാനും ആഗ്രഹിക്കുന്ന ആരോഗ്യവാനായ ഒരാൾക്ക് ഈ ഭക്ഷണക്രമം ഫലപ്രദമാണോ?

​അതെ, നിങ്ങളുടെ ശരീരപ്രകൃതിക്ക് (പ്രകൃതി) അനുസരിച്ചാണ് ഈ ഭക്ഷണക്രമം രൂപകൽപ്പന ചെയ്യുന്നത്. ശരീരത്തിലെ അപാകതകൾ മാറുന്നതോടെ ഇത്തരം പ്രശ്നങ്ങളും താനേ പരിഹരിക്കപ്പെടും.

​തടി കുറയ്ക്കാനും മുഖക്കുരു മാറാനും ഭക്ഷണക്രമത്തോടൊപ്പം യോഗ, നീന്തൽ, അല്ലെങ്കിൽ നടത്തം തുടങ്ങിയ വ്യായാമങ്ങളും ഡോക്ടർമാർ നിർദ്ദേശിക്കാറുണ്ട്.

7. സാധാരണയായി പ്രകൃതിചികിത്സാ ഭക്ഷണത്തിൽ എന്തൊക്കെയാണ് ഉൾപ്പെടുക?

​പ്രകൃതിദത്തമായ അവസ്ഥയിലുള്ള ആഹാരസാധനങ്ങളാണ് ഇതിൽ ഉൾപ്പെടുത്തുന്നത്. ഇവയിൽ കൃത്രിമ ചേരുവകളോ കീടനാശിനികളോ ഉണ്ടാകില്ല.

​ഉൾപ്പെടുത്തുന്ന ഭക്ഷണങ്ങൾ:

• ​തവിട് കളയാത്ത അരി, ചെറുധാന്യങ്ങൾ (മില്ലെറ്റ്‌സ്)
• ​ പഴയതല്ലാത്ത (ഫ്രഷ്) പഴങ്ങൾ (പ്രത്യേകിച്ച് ഋതുഭേദമനുസരിച്ചു ലഭിക്കുന്നവ)
• ​ആവിയിൽ വേവിച്ചതും പുഴുങ്ങിയതുമായ പച്ചക്കറികൾ
• ​പച്ചക്കറി സലാഡുകൾ, ഇലക്കറികൾ
• ​ഔഷധസസ്യങ്ങളും സുഗന്ധവ്യഞ്ജനങ്ങളും
• ​അണ്ടിപ്പരിപ്പുകൾ, തേങ്ങാപ്പാൽ/ വിത്തുകളിൽ(ബദാം പോലുള്ള) നിന്നുള്ള പാലുകൾ, പ്രകൃതിദത്ത എണ്ണകൾ
• ​എണ്ണക്കുരുക്കൾ
• ​പാൽ ഉൽപ്പന്നങ്ങൾ (ദഹനശേഷിക്ക് അനുസരിച്ച് മാത്രം)
• ​പുളിപ്പിച്ച ഭക്ഷണങ്ങൾ (ഫെർമെന്റഡ് ഫുഡ്)
• ​ഇന്തുപ്പ് അല്ലെങ്കിൽ കല്ലുപ്പ്
• ​കൃത്രിമ നിറങ്ങളോ പഞ്ചസാരയോ ചേർക്കാത്ത ഫ്രഷ് ജ്യൂസുകൾ
• ​അണ്ടിപ്പരിപ്പുകളും ഈന്തപ്പഴവും എള്ളും ചേർത്ത ലഡു പോലെയുള്ള പരമ്പരാഗത പലഹാരങ്ങൾ

​ശരീരത്തിന് ഊർജ്ജവും പോഷകവും നൽകുന്ന എല്ലാ ഭക്ഷണങ്ങളും ഇതിന്റെ ഭാഗമാണ്. എന്നാൽ വ്യക്തികളുടെ ശരീരപ്രകൃതി, വളർന്നുവന്ന സാഹചര്യം, പ്രദേശം, പാരമ്പര്യം എന്നിവയ്ക്കനുസരിച്ച് ഇതിൽ മാറ്റങ്ങൾ വരും.

​ഉദാഹരണത്തിന്, ഉത്തരേന്ത്യയിലുള്ളവരുടെ ഭക്ഷണത്തിൽ ഗോതമ്പ് വിഭവങ്ങൾ, കിച്ചടി, ലസ്സി എന്നിവ ഉണ്ടാകുമ്പോൾ, ദക്ഷിണേന്ത്യക്കാരുടെ ഭക്ഷണത്തിൽ പൊങ്കൽ, തൈര് സാദം തുടങ്ങിയ അരി വിഭവങ്ങളാകും ഉണ്ടാകുക.

​നിങ്ങൾക്ക് ഊർജ്ജം നൽകുന്ന ഭക്ഷണം മറ്റൊരാൾക്ക് തളർച്ച ഉണ്ടാക്കിയേക്കാം. ഉദാഹരണത്തിന്, രാവിലെ ചായയോ കാപ്പിയോ കുടിച്ചാൽ ഉന്മേഷം കിട്ടുമെന്ന് ചിലർ പറയുമ്പോൾ, അത് തങ്ങൾക്ക് അസിഡിറ്റിയും തലകറക്കവും ഉണ്ടാക്കുമെന്നാണ് മറ്റ് ചിലരുടെ അഭിപ്രായം.

8. ഈ ഭക്ഷണരീതിയിൽ ഒഴിവാക്കേണ്ടവ എന്തൊക്കെയാണ്?

• എല്ലാത്തരം സംസ്കരിക്കപ്പെട്ട (പ്രോസസ്സ് ചെയ്ത) ഭക്ഷണങ്ങളും:

a) ​വെളുത്ത/ബ്രൗൺ പഞ്ചസാര: ഇതിനുപകരം കരിപ്പെട്ടി (പാം ഷുഗർ), തെങ്ങിൻ ചക്കര (കോക്കനട്ട് ഷുഗർ  ), ശർക്കര അല്ലെങ്കിൽ തേൻ ഉപയോഗിക്കുക.

b) ​അയോഡൈസ്ഡ് ഉപ്പ്: ഇതിനുപകരം കല്ലുപ്പോ ഇന്തുപ്പോ ഉപയോഗിക്കുക.

• ​ശുദ്ധീകരിച്ച (റിഫൈൻഡ്) ഉൽപ്പന്നങ്ങൾ: പച്ചരി, മൈദ, തവിട് കളഞ്ഞ ധാന്യങ്ങൾ എന്നിവ ഒഴിവാക്കി പകരം തവിടുള്ള അരിയും ചെറുധാന്യങ്ങളും ഉപയോഗിക്കുക.
• ​എണ്ണയും വറുത്ത ഭക്ഷണങ്ങളും: ഇവയ്ക്ക് പകരം ബേക്ക് ചെയ്തതോ, വറുത്തതോ (ഡ്രൈ റോസ്റ്റ്), വെയിലത്ത് ഉണക്കിയതോ ആയ വിഭവങ്ങൾ ഉപയോഗിക്കാം.
• ​ A2 (എ2) നെയ് മാത്രം അതും വളരെ കുറഞ്ഞ അളവിൽ (ദിവസവും ഒന്നര സ്പൂൺ വരെ) മാത്രം ഉപയോഗിക്കുക.

9. പ്രകൃതിചികിത്സാ ഭക്ഷണം മാത്രം കഴിച്ചാൽ പൂർണ്ണ ആരോഗ്യം ലഭിക്കുമോ?

​ഭക്ഷണക്രമം ഈ ചികിത്സയുടെ അടിസ്ഥാനപരമായ ഒരു ഭാഗം മാത്രമാണ്. എന്നാൽ പൂർണ്ണ ആരോഗ്യം ലഭിക്കാൻ ഇതിനോടൊപ്പം പ്രകൃതിചികിത്സയിലെ മറ്റ് മാർഗ്ഗങ്ങളും പിന്തുടരേണ്ടതുണ്ട്.

​അവ താഴെ പറയുന്നവയാണ്:

• ​ഔഷധസസ്യങ്ങൾ
• ​അക്യുപങ്ചർ
• ​അക്യുപ്രഷർ
• ​യോഗ
• ധ്യാനം
• ​പ്രാണായാമം (ശ്വസനക്രിയകൾ)
• ​മർമ്മ ചികിത്സ (ശരീരത്തിലെ മർമ്മ പ്രധാനമായ ഭാഗങ്ങൾ കേന്ദ്രീകരിച്ചുള്ള ചികിത്സ)
• ​മേരു ചികിത്സ (ആരോഗ്യകരമായ നട്ടെല്ലിനുള്ള ചികിത്സ)
• ​ ഹൈഡ്രോതെറാപ്പി (ജലചികിത്സ)
• ​ മഡ് തെറാപ്പി (മൺചികിത്സ – മൺകളിമണ്ണ് ഉപയോഗിച്ച് വിഷാംശം പുറന്തള്ളൽ)
• ​പ്രത്യാഹാരം (ബാഹ്യ സ്വാധീനങ്ങളെ നിയന്ത്രിക്കൽ)

​നിങ്ങൾക്ക് ഏറ്റവും അനുയോജ്യമായ ഭക്ഷണക്രമം നിശ്ചയിക്കുന്നതിനായി ഒരു പ്രകൃതിചികിത്സകൻ നാഡി പരിശോധന (നാഡി പരീക്ഷ), രക്തപരിശോധന റിപ്പോർട്ടുകൾ, നിങ്ങളുടെ ജീവിതരീതിയെക്കുറിച്ചുള്ള ചോദ്യങ്ങൾ എന്നിവ പ്രയോജനപ്പെടുത്തുന്നു. നിങ്ങളുടെ ശരീരപ്രകൃതിക്ക് അനുസരിച്ച് തയ്യാറാക്കുന്നതുകൊണ്ട്, ആസ്വദിച്ച് ഭക്ഷണം കഴിച്ച് തന്നെ നിങ്ങൾക്ക് ആരോഗ്യം വീണ്ടെടുക്കാം.

​നമ്മുടെ സ്വാഭാവിക പ്രകൃതിയിൽ നിന്ന് വ്യതിചലിക്കുന്നതിനെയാണ് ‘വികൃതി’ എന്ന് വിളിക്കുന്നത്, ഇതാണ് രോഗങ്ങൾക്ക് കാരണം. നമ്മൾ പ്രകൃതിയോട് എത്രത്തോളം അടുത്തിരിക്കുന്നുവോ, അത്രത്തോളം മാനസികമായും ശാരീരികമായും വൈകാരികമായും സന്തോഷവാനായിരിക്കും. ഇതാണ് സമ്പൂർണ്ണ ആരോഗ്യത്തിന്റെ രഹസ്യം!

ശ്രീ ശ്രീ കോളേജ് ഓഫ് ആയുർവേദ സയൻസ് ആൻഡ് റിസർച്ച് ഹോസ്പിറ്റലിൽ നിങ്ങൾക്ക് ഒരു പ്രകൃതിചികിത്സകനെ സന്ദർശിക്കാവുന്നതാണ്.

​( ശ്രീ ശ്രീ ആയുർവേദ ഹോസ്പിറ്റലിലെ നാച്ചുറോപ്പത്തും ‘ആർട്ട് ഓഫ് ലിവിംഗ്’ അധ്യാപകനുമായ ഡോ. സൂര്യ രമേഷ് നൽകിയ വിപുലമായ വിവരങ്ങളുടെ അടിസ്ഥാനത്തിൽ തയ്യാറാക്കിയത്.).