ദേഷ്യം

മറ്റൊരാൾ ദേഷ്യപ്പെടുകയാണെങ്കിൽ എന്തുചെയ്യണം?

ആരെങ്കിലും അസ്വസ്ഥനാകുമ്പോൾ നിങ്ങളും അതേ സമയം അസ്വസ്ഥനാകരുത്. ആരെങ്കിലും അലറുകയും ദേഷ്യപ്പെടുകയും ചെയ്യുന്നുണ്ടെങ്കിൽ അവർക്ക് അവരുടെ സമയം അനുവദിക്കുക.നിങ്ങൾ ഒരു കാഴ്ചക്കാരനായ് മാത്രമിരിക്കുക. നിങ്ങൾ ആ ഷോയിൽ പങ്കെടുക്കേണ്ടതില്ല. മറ്റൊരിക്കൽ നിങ്ങളാവാം നിയന്ത്രണം നഷ്ടപ്പെട്ട് അലറുന്നതും , കോപം പ്രകടിപ്പിക്കുന്നതും. എല്ലാവരും ഒരേസമയം അഭിനേതാക്കൾ ആകുന്നതാണ് പ്രശ്നം, അപ്പോൾ കാഴ്ചക്കാരായി ആരുമുണ്ടാകില്ല . അതിനാൽ മാറിമാറി ദേഷ്യപ്പെടുക. മാറിമാറി അഭിനേതാവും കാഴ്ചക്കാരനും ആയിത്തീരുക ; അത് ആസ്വദിക്കുക! നർമ്മം കോപത്തിനുള്ള പ്രതിവിധിയാണ്. നിങ്ങൾ നിങ്ങളിൽ കേന്ദ്രീകൃതനാകുമ്പോൾ, നർമ്മം താനേ അവിടെ ഉണ്ടാകും.

ഒരു കാരണവുമില്ലാതെ ആരെങ്കിലും ദേഷ്യപ്പെടുകയാണെങ്കിൽ, അവരിലെ പിത്തം കൂടുതലാണെന്ന് മനസ്സിലാക്കി അവരെ ശാന്തരാകാൻ സഹായിക്കുക. ഉള്ളിലെ പിത്തം തണുപ്പിക്കാനായി ഐസ്ക്രീം, പാൽ പോലുള്ളവ ഉപയോഗപ്രദമാണ്.

ഒരിക്കലും ദേഷ്യപ്പെടാൻ പാടില്ലെന്നാണോ ?

ദേഷ്യപ്പെടുക എന്നത് ഒരു മോശം കാര്യമല്ല. അത് കുറച്ച് നിമിഷങ്ങൾ മാത്രം നീണ്ടുനിൽക്കുന്നതാണെങ്കിൽ കുഴപ്പമില്ല. വെള്ളത്തിൽ വരയ്ക്കുന്ന ഒരു വര എത്ര നേരം നിലനിൽക്കുന്നുവോ അത്ര നേരം മാത്രമേ അതു നിലനിൽക്കാവൂ. ഇടയ്ക്കിടെ കോപം വരുകയാണെങ്കിൽ നിങ്ങൾ സ്വയം കുറ്റപ്പെടുത്താൻ തുടങ്ങരുത്. ആത്മീയ പാതയിൽ വളരെ ദോഷകരമായേക്കാവുന്ന ഒരു കാര്യം സ്വയം കുറ്റപ്പെടുത്തലാണ്. കോപം പ്രകടിപ്പിക്കുന്നത് തെറ്റല്ല, പക്ഷേ നിങ്ങളുടെ കോപത്തെക്കുറിച്ച് അറിയാതിരിക്കുന്നത് നിങ്ങൾക്ക് ദോഷം ചെയ്യും. ചിലപ്പോൾ നിങ്ങൾക്ക് മനഃപൂർവ്വം കോപം പ്രകടിപ്പിക്കേണ്ടി വരും. ഉദാഹരണത്തിന്, ഒരു അമ്മ തന്റെ കുട്ടികളോട് അവർ സ്വയം അപകടത്തെ ക്ഷണിച്ചു വരുത്തുമ്പോൾ ദേഷ്യപ്പെടുകയോ കഠിനമായി പെരുമാറുകയോ ആക്രോശിക്കുകയോ ഒക്കെ ചെയ്യും. അത് അവരുടെ നൻമയെ കരുതിയാണ് എന്നതാണ് വസ്തുത.

കോപം വെല്ലുവിളികളെ ഏറ്റെടുക്കാൻ സഹായിക്കും, അല്ലാത്തപക്ഷം നിങ്ങൾ ഒരു പക്ഷേ അത് ചെയ്യാൻ തുനിഞ്ഞെന്ന് വരില്ല. ഇവിടെ കോപം എന്നത് നിങ്ങളുടെ ഉള്ളിൽ കയ്പ് നിറക്കാത്ത ഒരു വലിയ പ്രചോദനമായി വർത്തിക്കുന്നു. എന്നാൽ കോപം നിങ്ങളുടെ ഉള്ളിൽ കയ്പ് ഉണ്ടാക്കുന്നുവെങ്കിൽ, അത് നിങ്ങളെ തന്നെ തിന്നുതീർക്കും. കോപം തീ പോലെയാണ് ; അതിനു നിങ്ങൾക്ക് സുഖകരമായ ഊഷ്മളത നൽകാനും നിങ്ങളെ പൊള്ളിക്കാനും കഴിയും. ഇനി കോപത്തിന്റെ അനന്തരഫലങ്ങൾ നോക്കൂ. കോപാവസ്ഥയിൽ എടുത്ത തീരുമാനങ്ങളിലോ പറഞ്ഞ വാക്കുകളിലോ നിങ്ങൾ സന്തുഷ്ടനാണോ? അല്ല, കാരണം കോപം നിങ്ങളുടെ അവബോധം നഷ്ടപ്പെടുത്തുന്നു. എന്നാൽ നിങ്ങൾ പൂർണ്ണമായും ബോധവാന്മാരായിരിക്കുമ്പോഴാണ് കോപത്തോടെ പെരുമാറുന്നതെങ്കിലോ, അത് കുഴപ്പമില്ല.

കോപത്തിന് സ്പർശിക്കാൻ പോലുമാകാത്ത ഒരു തലത്തിലേക്കെത്തിച്ചേരാൻ നിങ്ങൾ കുറച്ച് സമയമെടുത്തെന്നു വരും. കോപം വ്യത്യസ്ത നിറങ്ങളിലും തീവ്രതകളിലും വന്നുകൊണ്ടേയിരിക്കും. അതുവരെ, നിങ്ങളുടെ പരിശീലനങ്ങൾ തുടരുക - സുദർശന ക്രിയ, പ്രാണായാമം, ധ്യാനം എന്നിവ നിങ്ങളെ സഹായിക്കും.