உங்கள் வாழ்க்கையை பெரும்பாலும் உங்கள் ஆழ்மனம்தான் வழிநடத்துகிறது. மேலும், பழக்கங்கள் என்பது அந்த ஆழ்மனதில் ஆழமாக பதிந்திருக்கும் விஷயங்கள். எல்லா பழக்கங்களும் தவறானவை அல்ல. உதாரணமாக, தினமும் பற்களைத் துலக்குவது ஒரு பழக்கம். அதைச் செய்யாவிட்டால் உங்களுக்கு அசௌகரியமாக இருக்கும். அது அப்படித்தான் இருக்க வேண்டும்! அதுபோல தினமும் குளிப்பதும் ஒரு பழக்கம். ஒரு நாள் குளிக்காமல் இருந்தால் ஏதோ குறைவாக உணர்வீர்கள். அதேபோல், சிலருக்கு காபி குடிப்பது ஒரு பழக்கமாகிவிடுகிறது. காபி குடிக்காமல் இருந்தால் தலைவலி கூட வரலாம்! காபி நல்லதா, கெட்டதா என்பது அந்த நபரையும், அவருடைய மருத்துவரின் ஆலோசனையையும் பொறுத்தது. சில பழக்கங்கள் உங்கள் உடலுக்கும், மனதிற்கும், ஆன்மீக நலத்திற்கும் தீங்கு விளைவித்து வேதனையைத் தருகின்றன.
ஒரு பழக்கத்தை விட முடியாதபோது, இயலாமை உங்களுக்கு ஒரு சிறிய உறுத்தலை உண்டாக்கும். அந்த வேதனையை நீங்கள் ஆழமாக உணரும்போது, அதுவே அந்தப் பழக்கத்திலிருந்து உங்களை விடுவிக்கும்.
– குருதேவ் ஸ்ரீ ஸ்ரீ ரவி சங்கர்
உதாரணமாக, மது அல்லது சிகரெட்டுக்கு அடிமையானவர்களை எடுத்துக்கொள்ளலாம். புகைப்பிடித்தல் உடல்நலத்திற்கு தீங்கு விளைவிப்பதை நன்றாக அறிந்திருந்தும், அவர்கள் தொடர்ந்து அதைச் செய்கிறார்கள். ஏன்? ஏனெனில், ஒரு பழக்கம் மகிழ்ச்சியைத் தருவதாக வாக்குறுதி அளிக்கிறது; ஆனால் உண்மையில் அந்த மகிழ்ச்சியை வழங்குவதில்லை. அப்படியானால், இத்தகைய பழக்கங்களிலிருந்து எப்படி விடுபடலாம்? அதற்கு மூன்று வழிகள் உள்ளன:
அன்பு (Love)
நீங்கள் மிகவும் நேசிக்கும் ஒருவருக்கு — உங்கள் மகள், மனைவி, தாய் அல்லது உங்களுக்கு மிகவும் பிரியமான வேறு யாராக இருந்தாலும் — ஒரு வாக்குறுதி அளித்தால், அந்த அன்பின் காரணமாக அதை நிறைவேற்ற முயற்சிப்பீர்கள்.
முதலாவதாக, உங்களைத் துன்பப்படுத்தும் ஒரு பழக்கத்தை விட முடியாமல் தவிக்கிறீர்கள். அதற்கு மேலாக, கொடுத்த வாக்குறுதியையும் காப்பாற்ற முடியாவிட்டால், அது இன்னும் அதிகமான வேதனையை உண்டாக்கும். ஒரு பழக்கம் மிகவும் ஆழமாக உங்களுக்குள் வேரூன்றியிருந்தால், அதை உடனே முழுமையாக விட முடியாது என்று தோன்றலாம். அப்படியானால், ஒரு குறிப்பிட்ட காலத்திற்கு மட்டும் அதைத் தவிர்க்க முடிவு செய்யுங்கள். உதாரணமாக: “அடுத்த 10 நாட்கள் அல்லது “அடுத்த ஒரு மாதத்திற்கு இந்தப் பழக்கத்தைத் தொட மாட்டேன்.” இவ்வாறு சிறிய படிகளாக முன்னேறுவது எளிது. ஒவ்வொரு கட்டத்திலும் வெற்றி பெற முடியும்.
பயம் (Fear)
இரண்டாவது வழி பயம். உங்கள் மருத்துவர், “இன்னும் ஒரு சிகரெட் பிடித்தால் போதும்; உங்கள் நுரையீரல் செயலிழந்துவிடும். உங்கள் கல்லீரலை சரிசெய்ய முடியாத அளவிற்கு பாதிக்கப்பட்டுவிடும்” என்று கூறினால், அந்த பயத்தின் காரணமாக நீங்கள் அந்தப் பழக்கத்தை உடனே நிறுத்தக்கூடும். சில நேரங்களில், ஒரு பழக்கத்தின் உண்மையான விளைவுகளை தெளிவாக உணர்வது அதை விடுவதற்கான சக்தியைத் தருகிறது.
பேராசை (Greed)
மூன்றாவது வழி பேராசை. யாராவது உங்களிடம், “ஒரு மாதம் முழுவதும் புகைபிடிக்காமல் இருந்தால், உங்களுக்கு ஒரு மில்லியன் டாலர் தரப்படும்.” என்று சொன்னால், நீங்கள், “ஒரு மாதமா? 35 நாட்கள் கூட புகைபிடிக்க மாட்டேன்”! கணக்கில் தவறு வரக்கூடாது என்று உறுதிப்படுத்திக்கொள்ள கூடுதலாக ஐந்து நாட்கள் என்று சொல்லலாம். அதாவது, ஒரு பெரிய பலன் கிடைக்கும் என்ற ஆசை, நீங்கள் விரும்பாத பழக்கங்களை விட உதவக்கூடும். அந்தப் பணம் மீதான ஆசையோ, அல்லது அதைவிட உயர்ந்த ஒரு இலட்சியத்தின் மீதான விருப்பமோ, அந்தப் பழக்கத்தை கைவிட உங்களுக்கு ஊக்கமாக அமையும். ஆக, கெட்ட பழக்கங்களை விட உதவும் மூன்று முக்கிய சக்திகள்: அன்பு, பயம்,
பேராசை ஆகிய மூன்று விஷயங்கள். ஆனால் ஒரு விஷயத்தை நினைவில் கொள்ளுங்கள்: “இனி வாழ்க்கை முழுவதும் நான் இதைச் செய்ய மாட்டேன்” என்று உங்களுக்கே வாக்குறுதி அளிக்க வேண்டாம். அதற்குப் பதிலாக, ஒரு குறிப்பிட்ட காலத்திற்கு உறுதி எடுத்துக் கொள்ளுங்கள். சிறிய வெற்றிகள் பெரிய மாற்றங்களை உருவாக்கும்.
பயமும், அன்புமே சிறந்த தேர்வுகள் என்பதை இறுதியில், நீங்கள் உணர்வீர்கள்: “ஓ! இந்தப் பழக்கத்தைத் தொடர்வதால் துயரத்தை வரவழைத்துக் கொள்கிறேன்” என்ற உண்மை ஒருநாள் ஆழமாகப் புரிந்தவுடன், அந்தப் பழக்கம் தானாகவே உங்களை விட்டு நீங்கிவிடும்.
பயிற்சி என்பது இடைவெளியின்றி, தொடர்ந்து, மரியாதையுடனும் அர்ப்பணிப்புடனும் தினமும் செய்யப்படும் ஒன்றாக இருக்க வேண்டும். அப்போதுதான் அது உறுதியாக நிலைபெறும்
– குருதேவ் ஸ்ரீ ஸ்ரீ ரவி சங்கர்
ஒரு நல்ல பழக்கத்தை எப்படி ஏற்படுத்திக்கொள்வது?
ஒழுக்கமே ஒரு நல்ல பழக்கத்தை உருவாக்குவதற்கான முக்கியத் திறவுகோல் ஆகும். இங்கும் அதே மூன்று உணர்வுகளைப் பயன்படுத்தி நல்ல பழக்கங்களை உருவாக்கலாம்:
- அன்பு (Love): நீங்கள் எதையாவது நேசித்தால், அதைத் தொடர்ந்து செய்வீர்கள். யோகாவை நேசித்தால், தினமும் யோகா செய்வீர்கள். உடற்பயிற்சியை விரும்பினால், அதைத் தவறாமல் தொடர்வீர்கள். கராத்தே மீது ஆர்வம் இருந்தால், யாராலும் உங்களைத் தடுக்க முடியாது. இசையை நேசித்தால், அதைப் பயிற்சி செய்ய நேரம் ஒதுக்குவீர்கள். எனவே, அன்பு ஒரு பழக்கத்தை உருவாக்கும் சக்தியாக மாறுகிறது.
- பேராசை (Greed): யாராவது உங்களிடம், “அடுத்த 40 நாட்கள் தினமும் சூரிய நமஸ்காரம் செய்தால் ஒரு மில்லியன் டாலர் கிடைக்கும்.” என்று சொன்னால், நீங்கள் 40 நாட்கள் மட்டுமல்ல, “பாதுகாப்புக்காக 45 நாட்கள் செய்வேன்!” என்று கூட நினைக்கலாம்.
- இரண்டு நாட்கள் முன்னதாகவும், இரண்டு நாட்கள் கூடுதலாகவும் செய்து, எண்ணிக்கையில் தவறு வராமல் பார்த்துக் கொள்வீர்கள். அதாவது, ஒரு பெரிய பலனை அடைய வேண்டும் என்ற ஆசை, உங்களை கட்டுப்பாட்டோடு இருக்க தயார் செய்யும்.
- பயம் (Fear): யாராவது உங்களிடம், “யோகா செய்யாமல் இருந்தால், இன்னும் சில மாதங்களில் இந்த உடல்நலப் பிரச்சினைகள் வரலாம்.” என்று சொன்னால், நீங்கள் பயந்து, “எனக்கு அந்தப் பிரச்சினைகள் வேண்டாம்; யோகாவைத் தொடங்கிவிடுகிறேன்.” என்று முடிவு செய்யலாம். சில நேரங்களில் பயமும் நல்ல பழக்கங்களை உருவாக்க உதவும் ஒரு உந்துசக்தியாக செயல்படுகிறது.
முடிவுரை
நமது வாழ்க்கை பெரும்பாலும் உங்கள் ஆழ்மனத்தால் வழிநடத்தப்படுகிறது. பழக்க வழக்கங்கள் ஆழ்மனதில் ஆழமாக வேரூன்றியுள்ளன. கெட்ட பழக்கங்களை விட்டொழிப்பதும், நல்ல பழக்கங்களை உருவாக்குவதும் உணர்வுகளின் சக்தியை சரியாகப் பயன்படுத்துவதன் மூலம் சாத்தியமாகிறது. குடும்பத்தினரின் மீதான அன்பு, கெட்ட பழக்கங்களை விட உதவும். ஒரு செயலின் மீதான ஆர்வமும் அன்பும், நல்ல பழக்கங்களை உருவாக்க உதவும். ஏதாவது ஒரு பலனை அடைய வேண்டும் என்ற பேராசை, தீய பழக்கங்களை விட்டுவிட்டு நல்லவற்றை ஏற்கத் தூண்டலாம்.
நோய் அல்லது பாதிப்பு பற்றிய பயம், தீங்கு விளைவிக்கும் பழக்கங்களை கைவிடவும், ஆரோக்கியமான பழக்கங்களை வளர்க்கவும் உதவலாம்.
ஆனால் இவற்றில், பயம் மிக மோசமான உந்துசக்தி. பேராசை அதைவிட சிறிது மேம்பட்டது. அன்பு தான் மிகச் சிறந்த வழி. ஏனெனில் அன்பின் மூலம் நீங்கள் கெட்ட பழக்கங்களிலிருந்து இயல்பாக உயர்ந்து வர முடியும்; அதே நேரத்தில் நல்ல பழக்கங்களை எந்தவித சிரமமும் இல்லாமல் வளர்த்துக் கொள்ளவும் முடியும்.
உங்கள் ஆழ்மனத்தின் சக்தியை வெளிக்கொணர கற்றுக்கொள்ள, வாழும் கலையின் ஆனந்த அனுபவப் பயிற்சியில் இணையுங்கள். இன்றே பதிவு செய்யுங்கள்!
